政情：財會加鐘審簡屋撥款 存疑慮 未敢掉以輕心

政府之所以提出興建簡約公屋，目的係要縮短輪候上公屋嘅時間，然而興建時間要兩年，最多住5年，即係2+5，但造價同選址備受質疑，尤其係啟德嘅選址更惹起鄰近居民反彈。即使楊永杰轉投支持票，都未夠穩陣，事關仍有議員嫌政府解釋得唔夠清楚。例如議員江玉歡缺席上個月初嘅工務小組會議，理由都係政府未釋除疑慮，其後佢亦要求政府回應逾10條問題，唔知佢今日會點投票嘞！

據聞，政府唔敢掉以輕心，就算明知係支持撥款嘅議員都照箍票，打電話叫議員必定要出席今日嘅財委會。其實班議員都唔想有任何甩漏。據悉，民建聯並無刻意提醒班黨友。議員郭偉强亦話工聯會內部無特別提醒大家投票，但工會係支持簡約公屋嘅項目，全部人都知道係非常重要，一定會去投。佢又話無官員「溫提」佢哋一定要投票。自由黨主席邵家輝亦話冇規定黨員必定要出席會議，但該黨嘅財委會成員都會「盡自己責任出席會議」。

而喺尋晚，即係財委會審議簡約公屋撥款嘅前夕，何永賢出席議員鄧家彪嘅網上節目再解畫，同時向啟德嘅居民派定心丸，指2+5後必定將土地交還發展局，按原先規劃發展商業用途。被問及簡約公屋項目嘅撥款似係闖關咁，何覺得形容恰當，因為佢哋擸起衫袖闖嘅，畢竟問題係公屋嘅供應量唔夠，要喺5年提供大量嘅簡屋供應，必須有勇氣同力度去闖。

咁有冇後悔推簡屋？佢話推嘅時候，大家對造價等有好多質疑，但當佢愈解說、就愈了解呢個項目嘅意思。再加上近期同劏房居民多咗接觸，深感劏房問題比想像中更嚴重。佢相信有啲朋友對簡屋可能仲有好多疑問，而政府係有必要解說清楚。