政情：立會新系統傳雜音 議員笑聲難禁

立法會尋日復會，出席官員準備用新裝設嘅音效系統，回答議員第一項口頭質詢嘅時候，竟一度發出雜音，以致會議需暫停一至兩分鐘之餘，議事堂仲傳出陣陣笑聲添，就連發言嘅官員亦都忍俊不禁，議員邵家輝就同梁君彥喺度研究啲雜音喺邊度嚟。幸好經秘書處人員調整設備之後，問題都好快得到解決，系統亦如常運作，無再出現問題。

就尋日朝早出現嘅「甩轆」情況，立法會秘書處解釋會議廳嘅雜音，同啱啱更換嘅咪高峰系統完全無關，二樓會議廳公眾席同記者席嘅電視先至係雜音來源，事關其中一部電視機嘅靜音功能喺開會期間發生故障。