政情：口罩快測棒少需求倡設站回收

雖然邁向全面復常，但疫情下醫療消耗品品質欠佳嘅情況，依然惹人關注。議員梁文廣就當局過去收到幾多宗醫療消耗品嘅投訴，以及有否就醫療消耗品同快速測試套裝設立監管制度，提出口頭質詢。另一方面，議員楊永杰就留意到口罩同快速測試套裝等醫療消耗品已被好多市民掃入冷宮，要求當局成立醫療物資回收點，予有需要嘅醫療機構可重用有關物資。

當局立法規管儀器

當局指出，由2019年至今共有60種表列快速測試套裝，而衞生署共接獲3宗有關醫療儀器嘅投訴，分別來自香港、內地同德國。局方又話新冠病毒快速測試套裝、血糖檢測試紙同驗孕棒等產品，屬於體外診斷醫療儀器，現時未有法例規管，不過特定產品受到《藥劑業及毒藥條例》規管，而且當局設有醫療事故呈報系統處理相關事故，並收集資料，從而提高對使用者保障，亦會容許已證明安全和性能符合國際要求載入醫療儀器名單供市民參考。政府又透露會就醫療系統建立法定規管制度，並適時提交立法建議。

至於設回收點處理醫療物資，當局話會研究有關建議，以及同其他部門商討安排，令過剩嘅醫療消耗品得到處理。