政情：立會換130支新咪 防雜聲鼎沸

梁君彥指科技進步、以及講求無紙化環保嘅今日，議員準備喺會議上發言，經常帶備手機或平板電腦等電子產品，然而會議廳嘅傳聲系統沿用至今超過10年，上一代嘅咪高峰並不具備防干擾功能，尤其是當手機接收訊息，往往會生噪音同雜聲，對會議進行構成滋擾。有見情況愈見嚴重，秘書處資訊科技組就趁休會期展開更換音效系統工程，其中包括約130多支咪高峰。

強調議會事務「休會不休班」嘅梁君彥話感謝香港生產力促進局提供專業意見，協助秘書處評估問題成因，合力揀選一套較先進同具備防干擾功能嘅音效系統。佢話新系統通過針對電磁干擾嘅測試，以及評估音效質素，效果令人滿意，大大改善會議廳嘅重要設備。