昔日東方政情：簡約公屋財會再議 楊永杰料跟隊支持
今屆政府首推「簡約公屋」，希望可以加快市民「上樓」嘅時間。但因為喺選址同埋造價方面，冇向社會清晰交代，結果引起唔少爭議。早前立法會工務小組委員會就通過第一批4個「簡約公屋」項目，後日將交財務委員會審議，而對此計劃最有意見嘅議員楊永杰早前喺工務小組投下「棄權票」，周五投票取態為何，自然備受關注。
當局早前宣布簡約公屋選址，包括喺啟德世運道興建一萬伙簡約公屋，導致區內業主強烈不滿，作為九龍中議員，楊永杰一度申請遊行，但不足一日內就撤回。至其後嘅工務小組會議，喺34票支持、0票反對及1票棄權下通過「簡約公屋」149億元嘅撥款。而楊永杰當時認為當局解釋得唔清楚，投下「棄權票」。
至於周五喺財委會嘅投票意向，楊永杰表示，所屬嘅「A4」聯盟將於今日開會決定，而聯盟喺一啲大議題上都會綑綁投票，梁文廣、張欣宇以及林素蔚3名A4議員均支持撥款，相信自己最終會投下「支持票」。
既然搭得支持「簡約公屋」呢條船，當然希望佢做得更好。所以楊永杰都預告，「A4」研究部將會喺稍後時間召開記者會，就簡約公屋多個範疇，例如重用簡約公屋等發表建議。之但係點解會喺投完票先舉行記者會呢？佢就解釋唔希望轉移咗焦點，或令社會覺得佢哋「搞事」，而係希望給予政府善意嘅提醒。
交代不清 江玉歡意向難定
至於因當局「文件不足」而拒絕出席工務小組會議嘅議員江玉歡，被問到會唔會再拒絕開會，江玉歡就指自己當日一定會出席，不過早前曾去信房屋局提出10多條問題，要求局方詳細回應開支等，但發信至今已經接近一個月，仍未收到局方回覆，故目前仍未決定投票意向。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
