政情：黃錦星做廚師宴客 荔枝窩炒蘿蔔

黃錦星煮咗乜嘢菜式宴客？講你都唔信，竟然係白蘿蔔。呢道菜式冇乜咁特別？事關係用低碳柴火烹調，喺露天嘅地方炒嘅荔枝窩白蘿蔔，佢話清甜無渣。聽到荔枝窩呢個名，就知道佢係推廣客家文化喇！

咁邊啲人有幸食到黃大廚嘅手藝呢？原來係班碩士生。佢話英國藝術學府中央聖馬丁藝術與設計學院香港大學專業進修學院合作，開辦藝術及文化企業文學碩士班，日前碩士班師生共廿幾人同一啲校友，連同喺英國嚟嘅合作夥伴教授，坐街渡去咗復育中嘅沙頭角荔枝窩客家古圍村。

行程中午飯時段，校方安排去體驗村中客家風味。佢就即興幫手，招呼遠近而來嘅客人。佢話班年輕碩士生相當享受村中氛圍，佢認為偏遠鄉郊嘅復育正需要多啲村內外嘅年輕人多元參與其中，兼且樂在其中。睇佢炒蘿蔔個樣，都樂在其中吖！