政情：收大相做餞別禮物鄭楚明：終於有今日

本身係天文台助理台長嘅陳栢緯喺今日坐正做台長，接替喺同日展開退休前休假嘅台長鄭楚明。鄭楚明對工作相當不捨，佢喺社交平台話收到新舊同事嘅心意，又展示咗同學畀佢嘅禮物，究竟係咩呢？

將退休離任天文台長

原來佢收到唔少禮物，當中包括咗一幅大相、茶具、茶葉、心意卡、筆、扇，仲有形態獨特嘅羅漢松。佢喺社交平台貼文話「有理由相信係Puzzle嚟嘅，其實唔係Puzzle，而係由多幅有我在內的細相切成的一幅大相。」佢仲大讚幅相好正添！亦都話筆同扇好合用，仲有實用嘅行李帶，遲幾日可以用。佢仲話自己「終於有今日」，即係代表終於要退休喇！

有唔少網民留言，相信部分同佢共事過，紛紛祝佢退休生活愉快，亦有網友估佢係退而不休，另有網友就話天文台係個有人情味嘅部門，而前台長岑智明仲話茶具係仿郎世寧嘅花鳥畫，題字「喜上眉梢」。