政情：邀藝人鬥籃球 議員盼為照顧者解憂

籃球賽喺荃灣某商場嘅室內3人籃球場舉行，本來議員隊嘅名單有李世榮、狄志遠、鄭泳舜、陳學峰同陸頌雄，不過陳同陸兩人未有露面，而鄭就遲到。結果首場賽事，議員隊由李世榮夥同狄志遠，另加一位外援以迎戰藝員隊。雖然對方有體形上嘅優勢，但頗具分量嘅李世榮亦唔輸蝕，投籃多次得手；狄志遠亦努力不懈咁喺籃底自由發揮，射咗幾球之後都成功拎到一分。

李、狄兩人打咗5分鐘就退下火線，交波畀啲後生仔繼續發揮。雖然最終落敗，但總算盡咗力。鄭泳舜雖姍姍來遲，其後都有落場露兩手。

喺籃球賽以外，商場內設有多個攤位及展板，讓大眾多了解照顧者面對支援不足等問題。勞工及福利局局長孫玉菡亦在場，佢認同現時照顧者津貼有優化空間，而照顧者專線及網站亦會即將啟用，未來會持續推廣協助照顧者工作。孫又指需要與照顧者嘅群眾增加接觸，並思考如何令資源到位。