政情：「綠在葵涌」月底收檔 又無公告

劉貴梅話「綠在葵涌」營運至3月31日嘅消息，都係街坊同佢講先至知。雖然開張嘅時候都係冇通知當區嘅區議員，但呢個回收便利點自啟用以來，無疑係方便區內居民實踐環保回收，況且憑回收物累積分數繼而換取禮品嘅策略，的確令到街上嘅可重用物件少咗好多。依家突然話結束營運，佢擔心居民已經養成嘅回收習慣會有所倒退。

至於當局擬採取辦公時間設置流動街站嘅回收措施，劉貴梅話「綠在葵涌」嘅開放時間較長，更能促進回收工作；而從過去經驗睇，街頭回收桶其實同垃圾桶無異，仲會加重清潔工人嘅負擔。佢話「綠在葵涌」結束後，當區再冇同類型嘅回收點，加上即將實行垃圾徵費，憂慮環境衞生情況會進一步惡化咁話。