政情：預算案鼓勵生育 龐愛蘭嘲唔到肉

唔講唔知，原來林振昇同龐愛蘭係讀同一間中學，而龐係林嘅大師姐。當大家傾到子女免稅額時，龐憶述以前養育囝囝時都嫌政府喺稅務方面「扣咁少錢」，即使最新一份財政預算案，有關子女免稅額方面亦只可以用「蜻蜓點水」嚟形容。佢話養育兒女嘅使費係好大㗎；若果年輕夫婦嘅收入只能照顧自己同父母，經濟必然相當吃力，生育計劃就難以成為優先選項，所以稅務寬減嘅額度應該要提高一啲，如果能有所獎勵就更好，譬如生咗小朋友，有關房屋福利嘅抽籤可以抽多次，又或者排隊上樓可獲優先。

作為過來人，佢話婦女未生仔，腦海先浮現好多問題，因此心理諮詢都好重要，畢竟女仔結婚生小朋友，係人生角色一次大轉變，榮升做媽媽之前宜有心理上嘅支援，對將來種種挑戰有所預期並早作準備，以迎接新生命嘅降臨，可能會多啲年輕男女願意早啲生育下一代。