政情：婦女節華服現身 絕「珮」「麗」人

由郭玲麗喺社交平台上載嘅相片可見，佢同陳家珮兩人身處一個花園，現場繁花似錦，陳家珮則坐下並雙手交疊，而郭玲麗則站立，兩人同背景毫不違和，仲充滿住古典氣息，有網民更留言話好漂亮添。而陳家珮近日亦出席一項「三八」婦女節嘅活動，佢指出依家世界上唔同嘅精英團體，都見到愈來愈多女性參與其中。而喺男女逐漸走向近乎平等嘅情況下，女性應該繼續努力學習新知識，喺唔同嘅領域發揮女性嘅強項，努力表現半邊天嘅支柱能力。

另外，議員梁美芬則喺內地開會，雖則無隆重嘅衣着，但仍冇忘記呢個節日，都特意着上桃紅色嘅衫，同大家一齊慶祝，祝大家婦女節快樂咁話，期間更與近年專注設計珠寶及投身社會事務嘅鄺美雲合照添！

至於議員張宇人則聯同該黨區議員、黨友等，趁婦女節喺銅鑼灣街頭向一眾為社會、為家庭不辭勞苦嘅女士致送鮮花，以表達祝福同感謝，相信唔少收到花嘅女士，都歡欣開懷。

而議員江玉歡就對「三八」婦女節好有感觸，佢指自己年幼時家境欠佳，好少有機會着裙，並好羨慕其他女同學可打耳窿戴耳環。而大個咗之後，佢就開始學化妝學打扮，但最後都明白自信先係女性最好嘅化妝品。不過佢對現今社會男女地位仲有保留。佢指出立法會女性議員屈指可數，僅得十幾個，而唔少年輕嘅專業女性，為咗照顧家庭而放棄事業發展。所以佢希望日後多為女性、特別係基層女性發聲。