政情：抗疫物資供過於求 何偉霖籲港府回收

何偉霖話呢個社區雪櫃，起初係存放一啲罐頭乾糧供有經濟困難人士自行索取。後來疫情爆發，社區雪櫃就成為街坊共享抗疫物資嘅一個渠道。佢認為即使口罩令撤銷，但一啲衞生嘅需求依然存在，相信假以時日，酒精搓手液同口罩嘅存量可望減少；但檢測棒就好難講啦，事關今時今日，再冇活動要求參與者事前做快測。

由於檢測棒係有保質期，佢話會定期檢查，若發現物資過期就會銷毀。佢話疫後復常，政府同環保團體就應該設法回收抗疫物資，然後睇吓有無轉為其他用途嘅機會，否則只會造成浪費或損害環境。