昔日東方政情：謝偉銓關注高齡的哥 提質詢早過車禍
日前北角炮台山道發生嚴重車禍，一輛失控嘅的士橫衝直撞，恍如「保齡球」咁傷及3名途人，事件不但令全城震驚，建築、測量、都市規劃及園境界議員謝偉銓（Tony）亦為之愕然，事關佢嘅住所就喺意外現場附近。Tony日前喺社交平台貼文，話呢宗意外再次引起社會對的士司機高齡化嘅關注，仲話咁蹺佢喺一個禮拜前向立法會秘書處申請就「的士司機高齡化及人手短缺」提出質詢，但最快要排到本月尾嘅大會先有機會抽中。
要求政府交代應對
Tony唔係有預知能力，而係涉及高齡司機嘅意外已有前科，且有惡化嘅趨勢。佢舉例話今年一月，一名87歲的士司機於短短9日之內發生3次意外，最嚴重一次導致整架的士翻側，有乘客受傷送院，所以佢希望政府交代涉及的士嘅意外，提交唔同年齡組別嘅司機涉及意外嘅數字。佢亦要求政府就的士司機高齡化、人手短缺同駕駛安全問題，交代採取邊種措施同有乜嘢具體成效，同埋有冇研究點樣促進的士業界應用新科技，以減少交通意外嘅機率。
運輸署署長羅淑佩呢兩日都話要檢討70歲以上嘅的士司機體檢機制，仲話專家小組正檢視呢啲問題，今個月有會開，若方案成熟，好快會諮詢業界同交立法會討論，展開修例工作，又保證今次檢視唔會不了了之。雖然Tony口頭質詢要到月底先可能提到，即係仲有3個禮拜時間，相信運輸署點都做到啲嘢出嚟，到時運輸及物流局局長林世雄唔會擘大個口得個窿啩！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
