政情：密密爆水管 陳穎欣斥當局不治本

發展局首席助理秘書長同水務署助理署長回應今次意外發生原因，話係因為其中鄰近一個路口位置嘅水管冇更換。陳穎欣話水務署應盡快全面更換及加強檢修葵青、荃灣區的老化喉管，同時加強監測水管滲水等問題，批評新界西南區屢次出現大規模停水極為不理想，經多次反映問題後仍然頻頻發生，可見當局處理上「治標不治本，令人難以接受」，發展局同房屋署等部門都要做好溝通協調。

對於今次意外，陳穎欣話有關通報機制同溝通工作都比過去有明顯改善，當局都提前安排咗水車同水箱到社區，但有居民反映臨時供水水箱唔夠，好難提前知道擺放嘅位置，建議當局因應突發停水事故嘅嚴重程度，加快調配同增加臨時供水水車數量，而且要盡快通報房屋署同受影響樓宇代表，通知居民臨時供水嘅位置；又要求當局研究引入同改善現有智能水管滲水監測系統；發展局要協調各部門及屋邨、樓宇代表，就不同土地擁有者解決維修水管問題。