政情：幫婆婆換窗 黃傑龍「拆」唔掂

其中一個婆婆就想換窗，黃傑龍就化身師傅助手幫手裝窗，點知有粒螺絲拆唔到出去，搞到佢手震震、面都紅晒都搞唔掂，師傅就睇唔過眼出手，原來佢整咗咁耐嘅螺絲，喺師傅手中一眨眼就拆咗啦喎。

咁需要用輪椅嘅長者，家居有乜嘢要注意嘅地方？佢都有啲心得，例如洗手間唔可以過窄、有階級，門就要變趟門，洗手盆高度要降低，要裝扶手等等，佢話兩個禮拜前都冇諗過呢啲問題，係最近觀察幾個個案先明白，又話如果長者所有嘢都要人哋幫手先做到，佢哋嘅心理質素都會下降。言下之意，即係家居設計都要便利長者自己生活啦！

佢依家就50幾歲，亦開始諗緊將來要面對類似問題嘅話點算，佢意識到自己平時唔會留意廁所出面有一級，但當去到連去廁所都要有人幫嘅時候，呢一級就有好大障礙啦，所以佢都希望大家多諗諗長者嘅需要。