政情：卸下勞顧會職責 鄧家彪獲贈紀念冊

阿Bill話紀念冊係由勞工及福利局局長孫玉菡聯同勞工處同事所送贈，內裏載有好多工作照，記錄佢喺勞顧會精彩而難忘嘅時光，不禁憶起擔任勞方委員嘅種種努力，包括增加男士侍產假、婦女僱員有薪產假14周、取消強積金對沖遣散費/長期服務金、法定勞工假期逐步增加至17天、極端情況工作指引等。佢期望勞、官、資三方協作、有商有量咁提升僱員待遇，以及促進經濟而努力。

至於任內想做但又未完成嘅事，阿Bill就話有關連續性合約嘅檢討，係佢喺勞顧會最後參與嘅討論。就連續性合約規定中嘅每周工時18小時，佢建議下調、或改為以4周為一個計算單位，或按比例計算未達連續性合約規定嘅僱員福利；另外就係改善外賣平台僱傭關係。鑑於當局將於年中發布整體人力規劃推算，屆時相信勞顧會亦會係一個關鍵平台，可惜無機會參與討論，不過交由新一屆委員接手，相信亦可以發揮功能咁話。