昔日東方政情：變四眼一族 梁栢賢新形象獲讚醒目
年輕時嘅視力無論有幾咁銳利，上咗年紀少不免都要戴番副眼鏡。醫院管理局前行政總裁梁栢賢（PY），最近就成為「四眼一族」，尋日喺銅鑼灣攞咗新配嘅眼鏡之後，隨即將自己嘅新造型上載社交平台，話適逢口罩令解除，行街以新形象示人，希望朋友會認得喎。之不過，鍾情球類運動嘅PY，戴咗眼鏡會唔會無咁方便呢？
其實PY戴眼鏡嘅原因主要係打乒乓波，事關佢近來發覺自己嘅散光嚴重咗。有網友提醒佢，初戴眼鏡打波係要習慣㗎，尤其係距離同眼鏡邊位，初期要時間適應視野。
慶祝生日遊泰 心廣體胖
至於佢成為四眼仔嘅新形象，就獲得唔少好評，譬如前議員李國麟就留言讚佢醒目、靚仔；但亦有人好直白咁講，話佢「肥咗又靚咗，完全唔認得」咁話。
對於有網民話佢「心廣體胖，下巴肉見人啦」，PY好大方咁承認，話對方嘅觀察力好強之餘，又解釋話上個月係佢嘅慶生月，難免食多咗嘢。
佢仲話近日因為去咗泰國旅行，食得又瞓得，所以肥咗，因此要加緊做運動減磅。至於戴咗新配嘅散光眼鏡之後，當然係希望打乒乓波時能夠得心應手啦！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
