昔日東方政情：梁子穎扮經典廣告 陸頌雄讚似癡漢
時下嘅宣傳片往往要睇好耐，先至知道乜嘢葫蘆賣乜嘢藥。工聯會嘅社交平台日前上載短片，劈頭第一幕就見到議員梁子穎對住電單車倒後鏡輕撥頭髮，表情靦覥不已，不斷自言自語咁話「咦，乜咁啱嘅？」繼而有一妙齡倩影喺鏡中一閃而過，梁子穎即轉身尾隨，又喺大街小巷追追逐逐、尋尋覓覓，游目四顧女神芳蹤，直至某課室外面，佢嘅心儀對象突然現身，同佢講「Hi，乜咁啱嘅？」到底呢條短片想透露乜嘢訊息呢？莫非係癡漢出沒注意？！
宣傳職業再培訓課程
答案揭曉，當妙齡女話「你又嚟報課程呀？我哋可以做同學啦，Bye！」原來梁子穎今次粉墨登場，係宣傳職業再培訓課程，而佢所屬嘅工會同僱員再培訓局就係合辦嘅機構。對於有番咁上下年紀嘅網民，睇見呢條片都會覺得熟口熟面。皆因劇情係仿照三十年前某盒裝檸檬茶廣告，之不過，當年豆蔻年華嘅女主角，其情竇初開、心有所屬但又羞於啟齒嘅心情，今日就改由已屆中年嘅男士重新演繹，效果令人莞爾。
梁子穎嘅議員同事睇完呢條宣傳片，會否萌生當年情懷呢？陸頌雄指片中嘅妙齡女從沒有正面示人，盼一睹其芳容之餘，又指梁子穎扮演癡漢嘅演技愈嚟愈神似；郭偉强似乎亦有同感，仲特別強調佢舔脷嗰一下動作；林琳就簡單直接，一個「正」字概括呢段宣傳片嘅評價。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
