政情：除罩陳沛良盼唔使再被點錯相

疫情下，香港市民日日都要戴口罩，隔住個口罩睇唔到個樣，搞到人人都好似有「面盲症」咁，成日都認錯人。有兩位政界中人都試過因為戴口罩而畀人「點錯相」，講緊嘅係邊個？咪就係議員「劉智鵬」同「陳沛良」囉。之不過，隨住政府宣布取消口罩令，相信呢兩位政界中人都可以鬆一口氣嘞！

曾畀人當做劉智鵬

話說疫情嚴峻期間，政府推出口罩令要求市民喺公眾場合戴口罩，結果唔少人都因為咁成日畀人認錯，而鬧出唔少尷尬嘅場面。政界當中最出名嘅當然係陳沛良同劉智鵬啦！事關兩個人之前都試過畀人點錯相，有傳媒喺報道劉智鵬嘅時候用錯陳沛良嘅相。而陳沛良之前都透露自己去立法會「咖啡角」用餐，試過畀職員認錯人，喺張單寫上劉智鵬，到埋單時先發現寫錯名。

相信隨住今日開始全面取消口罩令，此情此景都未必會再發生啦！陳沛良都笑言「未來大家脫下口罩，相信記者朋友們應該不會誤認我是另外一位議員了」。相信喺今日除口罩之後大家應該唔會再咁易擺烏龍，最多都係認錯「許志安」同「杜德偉」啫！