政情：狄志遠話抗爭已過去 又提政改遭阿彪質疑

由議員鄧家彪（阿彪）主持嘅網上節目邀請咗狄志遠做嘉賓，鄧先笑稱狄為資深嘅政治人物，事關狄喺1988年已擔任區議員，1991年更喺新界北選區得到21,702票成為立法局議員。訪談亦都唔拖泥帶水，被問到點睇議會運作，狄話議會以前拉拉扯扯，拉布等抗爭已過去，亦唔符合香港作風，唔見社會進步。不過，佢明白泛民主派點解行到呢步，因為當時民意唔能夠彰顯。

雖然有聲音話立法會好似少咗火花，但狄志遠強調一直做實事，就好似佢同鄧家彪，分別就政府喺疫情未能向院舍提供適切嘅援助，喺福利事務委員會提出「遺憾議案」及修正案，喺無人反對及4票棄權下，通過動議。

鄧家彪亦讚佢喺議會發揮得幾好，屬「是其是非其非」，但質疑點解佢仲要講政改。狄話一方面係市民訴求，而且民主制度下社會運作得會較理想，加上《基本法》亦說明雙普選。講到舊時嘅議會，狄話過去議會較精英化，政治圈較精英，有直選後，議會精英化慢慢普及。

之不過，佢所創立嘅政黨一直嘅定位畀人感覺唔清晰，佢又點樣解釋呢？佢話香港政治氣氛係兩面，好多人都係泛民系統出身，但民主派圈子愈漸激烈，有時喺政治上唔係好合理之下，好似政改831方案行一步好過唔行，但民主派堅持唔讓步，件事唔會有好處。因此佢成立相關政黨，行溫和理性路線，亦有智庫成分，定位係一個細黨，有10幾個核心成員，稱人少好辦事，又話唔想吸納太多人，亦有培訓人才。