昔日東方政情：赴長沙視察生產線 議員組團局長唔去
近日社會上熱烈討論簡約公屋項目，而簡約公屋以組裝合成建築法建造，興建速度較快，期望能改善等緊上樓市民嘅居住環境。而喺早前嘅立法會會議上，有議員公開邀請房屋局局長何永賢一齊往內地考察，睇吓內地點樣以組裝合成法加快興建房屋，當時何就回應指希望可以帶埋同事去。說時遲那時快，一眾議員尋日到湖南省長沙市視察，之不過何就似乎「甩底」冇去到喎。
議員李梓敬喺社交平台貼文話，4年冇搭過高鐵，佢哋出發喇。去邊呢？就係去長沙市睇簡約公屋。睇返佢上載嘅幾張相，議員邱達根、狄志遠都有份。雖則何永賢冇親身上去，但房屋局政治助理歐陽文倩就有隨行喇。到達後佢哋就立即去視察建築組裝物料嘅生產線。
議員曾邀請何永賢獲回應
其實，當日議員公開邀請何永賢一同到內地考察，何回應話樂意到內地考察，但就希望唔止兩個人去，反而想帶埋啲同事，李梓敬當時亦指希望可以做「電燈膽」一同前往考察。如今同事就有去啦，但就唔見局長身影，唔知佢忙緊乜嘢呢？
視察完建築組裝物料生產線之後，緊接就前往睇實物啦，即一間組裝合成嘅酒店，足足有39米咁高。該酒店係新嘅物業發展，本身當作隔離酒店用途，但隨內地隔離政策調整，現時已取消作為隔離酒店。
邱達根參觀時就提到，單位大小足夠，如果香港嘅青年宿舍有咁嘅空間都相當唔錯。佢又認為組裝合成係新方法，期望喺香港都能成功。多位議員參觀時都覺得整體唔錯，唯一美中不足就係酒店嘅逃生梯附近嘅玻璃太矮，笑言如果人太蠢，好容易差錯腳跌落街，認為需要改善咁話啦。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
