政情：炒栗子車遭驅趕 郭偉强冀多包容

郭偉强話當日去到現場，希望以合理方式協助炒栗子車嘅小販伯伯，同時亦見到有街坊聲援，話由細食到大，幫襯咗好多年之類，希望食環職員唔好趕盡殺絕。佢認為只要唔會阻塞通道或影響交通，當局應容許持牌小販就地經營，況且該炒栗子車當日所在之處，路面足夠闊落，附近又冇其他小販做買賣，真係唔明白點解會成為「黑點」。不過，佢話炒栗子車難免會產生一啲煙同氣味，並非人人都可接受，所以佢都同意炒栗子車每隔一段時間應轉移陣地。

結果食環職員話今次只係做一個紀錄，勸喻小販伯伯多轉換不同位置，減少被投訴嘅機會，之後就收隊啦。郭偉强指經營炒栗子車嘅伯伯係獲政府發牌嘅小販，自食其力嘅態度應獲扶助，而非封殺。至於巿民嘅投訴，當局亦應判斷是否合理咁話。