政情：遭立會DQ焗回水93萬 游蕙禎還到明年始甩難

喺2016年因宣誓風波被DQ嘅游蕙禎同梁頌恆，拖欠立法會93萬元已發放酬金、利息同訟費。據了解，行管會接納游提出嘅48個月分期還款建議，每月約清還一萬至兩萬元，而佢亦按時支付。至於同游一樣因喺宣誓時發表「港獨」言論被DQ、已去咗美國嘅梁頌恆，已被法庭宣判破產。

因宣誓風波被DQ嘅仲有另外4名泛民人士，包括身處英國被通緝嘅前香港眾志主席羅冠聰、劉小麗、姚松炎同梁國雄（長毛），佢哋要歸還19萬至31萬元不等，但長毛喺限期前未有接納行管會嘅建議。前3者已清還欠款，而據了解，經過多番擾攘後，長毛亦已全數付清。

至於因選舉呈請，被法庭裁定「非妥為當選」嘅3名人士，同埋喺2020年11月下旬政府按照全國人大常委會嘅決定，裁定提名無效而被DQ嘅4名泛民人士，亦已按同行管會嘅協議，全數清還欠款。