政情：中大醫院延遲還款40億 議員質疑營運能力

議員梁美芬指，中大醫院一開口就提出順延還款期5年係不合理，因為只會指出當初嘅營運計劃係不實際，而立法會有責任監管公帑運用。佢又指出中文大學過去嘅管治問題，令人十分憂心，而中大醫院作為中文大學嘅附屬機構，「錢係點樣分成」亦令人質疑，要求校方每一年都到立法會交代情況。

議員李鎮強指留意到中文大學一向有注資到中大醫院，過去額外注資逾3億元，質疑今次無注資嘅原因，係咪出現「有錢賺就投資，見到冇錢賺就縮」嘅情況。而議員謝偉銓亦關注當初中大醫院喺簽署相關貸款時，有否參考財務顧問意見，若果有「財務顧問就真係麻麻地」，因為一間醫院無可能喺營運兩至3年便可以還錢。

政府代表指中大醫院唔係公立醫院，而係一間私營醫院，希望可以達致收費合理，以及透明，亦唔可以要求無止境地提供醫療服務。政府又指中大醫院營運時間較短，亦需要探索期，當中嘅收費模式亦十分創新，唔希望將中大醫院推番落個森林入邊，去到變番一隻老虎，純粹以牟利增加服務等。而現時嘅還款期，係令中大醫院走上淨盈餘嘅還款軌道咁話。

中大醫院原定今年起須償還於2015年4月批准嘅40.33億元政府貸款，但由於疫情關係影響運作，建議先讓政府容許中文大學醫院順延首兩年，之後視乎立法會衞生事務委員會檢視中文大學醫院嘅財務狀況，再尋求財務委員會批准讓政府容許中文大學醫院順延餘下3年。換言之，即係將還款期順延至2028年首次還款，並分10期每年還款至2037年，原本預計要收嘅利息則由中大醫院喺15年期間提供公共醫療服務取代，議程最終獲得通過。

根據中大醫院匯報，如按照原定嘅還款時間表，未來10年現金流預測狀況惡劣，其現金結餘由2023至2032年將維持負值，其中喺2027年會達至負逾20億元嘅最低位。簡而言之，中大醫院如不獲政府支持，將無法維持營運。