政情：陳穎欣擺街站 雪糕筒兜頭擲

Joephy喺社交平台貼文講述事件嘅經過，話說當時有一名途經嘅中年女子，喺佢同班義工身邊走過，然後走上街站後面嘅商場扶手電梯，嗰名女子突然將一個相信係屬於商場嘅安全雪糕筒喺高處投擲到路面，而嗰個雪糕筒就跌落喺街站附近，真係差啲就掟中。

究竟乜嘢原因要高空擲物？Joephy話街站嘅位置係區內人流多嘅地方，而事發時間亦係放學、放工嘅繁忙時間，極有可能引致非常嚴重嘅後果，所以佢譴責所有不顧市民安危嘅行為，亦絕不容忍任何形式嘅暴力或襲擊。佢強調香港係法治社會，無論任何人有任何目的、有任何意見想表達，都必須依法同和平理性。