不滿簡約公屋選址 市民反叫政府慳啲

政府嘅如意算盤，係擬斥260億元喺8個選址興建合共3萬個簡約公屋單位。江玉歡認為若果計埋整個計劃期間嘅營運支出、5年後拆卸嘅費用同埋相關嘅配套設施，埋單相信要360億元。佢話呢筆公帑足夠派畀12萬劏房戶，每戶每月5,000元，派足60個月，咁就可以立即紓緩劏房戶居民嘅生活重擔，社會大和諧，與此同時政府亦可定下告別劏房嘅期限，房委會加快興建優質公屋，建築署亦可省回，為興建簡約公屋而加設嘅50個職位，既可慳番每年幾千萬嘅薪水支出，又可以專心做番本業，反正未來幾年大把政府工程要做啊！

江玉歡又話愈嚟愈多識計數嘅市民同佢講，點解唔直接派錢畀劏房居民？而要花錢起唔知有冇人去住嘅簡約公屋，住夠5年又話要拆。況且珍貴嘅地皮，可出售賺錢令庫房進帳。究竟劏房戶會鍾意等候簡約公屋，還是派錢方案呢？佢話唔想要現金的話，亦大可輪候萬多個正在興建，並將會喺未來這一、兩年落成嘅過渡性房屋。

實際上，小欖居民喺線上會議話樂安排簡約公屋選址錯誤，話嗰度只有一條青發路，但附近就有幾個屋苑約500伙住戶，若再加5,000戶簡約公屋，道路嘅交通流量勢必飽和，一旦發生事故，緊急車輛出入同人群疏散恐成一大問題。況且選址旁不到50米有危險品倉庫，擔心多人遷入會增加事故嘅風險，導致鄰近屋苑嘅保險費上升。

江玉歡話居民質疑當局點解唔先利用閒置嘅方艙？佢話稍後會將居民嘅意見整理，再去信房屋局局長咁話。