政情：申訴署查村屋僭建 鄉紳斥針對

話說申訴專員公署日前公布新界村屋僭建物調查，前新界鄉議局研究中心主任薛浩然就狠批事件係針對新界村民。佢話香港有大量僭建，尤其係市區某啲高樓大廈，其僭建物對市民嘅威脅更大，但政府就淨係搞新界僭建問題。佢認為處理僭建物並無問題，但必須一視同仁，唔可以淨係針對新界村屋，要處理就要連同市區嘅僭建物一齊處理，「新界拆一間，市區拆一間」！

講到僭建問題，氣憤嘅又點止薛浩然一個。尋日正值新界鄉議局執委會舉行會議，唔少人都對村屋僭建問題又再發酵頗有微言，盼鄉議局主席劉業強幫手反映村民意見。

唔單止咁，更有鄉紳不滿某啲媒體「標籤咗有僭建物就係原居民」，話其實唔少有僭建物嘅村屋並非由原居民擁有，反而係其他非原居民租用之後再僭建先搞到咁喎。