政情：立會大樓遭衝擊 留下創傷痕迹

人就話有創傷後遺症啫！石屎樓都有？立法會大樓被破壞後，內部嘅設施簡直千瘡百孔、幾乎爛晒，譬如電腦系統等要維修，牆壁被劃到花晒，當中有圖案亦有粗口，要洗甩呢啲噴漆相當費力，但總算都洗得甩。

以為可以放心，點知隔冇耐，呢啲粗口字同圖案會「復活」。據了解，呢種情況喺大樓外圍出現，由於牆身物料嘅關係，啲噴漆滲入啲質料裏面，縱使洗乾淨咗外邊嘅漆油，但當天氣潮濕嘅時候，就會浮現番出嚟，幸好只係好淡色。

唔單止咁，大樓地下大堂都有改動，例如影團體相背景嘅「立」字都執過。雖然背景同樣係大型「立」字，配以直條金屬作支撐，但以前個「立」字係嵌入嘅，傳聞話好似立法會被萬箭穿心咁，唔多老利，於是改咗個「立」字凸出嚟嘅，啲「箭」全部被壓喺下低。經此改動，立法會又會唔會無風無浪呢？