政情：中招元兇逐個捉 梁君彥賴人播毒

點解同張宇人有關？回一回帶先，張宇人喺舊年12月21日確診，而20號就返過立法會大樓，喺8樓嘅議員辦公室逗留過，亦喺7樓會客室開過會，而翌日即係22日梁君彥嘅快測結果為染疫，跟住要進行隔離，梁君彥21日喺立法會大樓，當日快測結果係冇染疫。

雖則張、梁兩人於21日並冇喺立法會大樓接觸過，應該同染疫冇關係。但梁君彥話喺染疫之前嘅周日，佢同張宇人出席一個婚宴，兩人同枱但隔開一個位坐，而在席有兩對友人夫婦。當晚嘅婚宴後，隔咗兩日，張宇人先中招，而翌日佢亦都染疫。

咁都冇證據係張宇人播疫㗎？佢哋仲隔位坐添！梁君彥話事後得知，佢朋友司機個仔見過張宇人，仲幫佢喺街頭影相，而司機個仔事後亦中招。啊！原來呢個先係關鍵。梁話佢同朋友司機個仔冇接觸過，好明顯係張宇人散播病毒，經過抽絲剝繭後，鎖定係張宇人傳染佢，仲話自己中招，「我賴佢」。梁君彥仲話中招後，抗體大增高達12,000，醫生同佢講打針都冇咁高呀！