昔日東方政情：立會關注度大減 波哥有讚冇彈
無晒反對派 抗爭場面不再
新選舉制度下嘅立法會「五光十色」，過往「拉布」、流會或衝擊主席台等抗爭場面已不復再。之不過，唔少市民對立法會嘅關注程度大減，過往連某啲議員個名都噏唔出，今屆90個就更加嚴重。惟財務委員會前主席、議員兼行政會議成員陳健波（波哥）出席一個網台節目時，話以前吵吵鬧鬧做唔到嘢，依家做嘢快好多。佢又話議員千祈唔好去做「Show」，或者做啲好突出或者誇張嘅嘢，要搵自己專長嘅議題。
網台節目由議員鄧家彪（Bill）主持，阿Bill關注議會嘅討論程度。波哥話以前吵吵鬧鬧做唔到嘢，依家一條心搞好香港，發揮到議會功能，依家做嘢快好多。至於有聲音話議會好悶，波哥反問追求一個連續劇、高潮迭起咁好過癮，但跟住咩都做唔到，定係好似好平淡咁但係做到嘢，令大家生活有改善，又話香港蹉跎好多年歲月。
寄語議員唔好做騷
新一屆立法會有好多新面孔，但阿Bill唔算係新人，事關佢之前做過一屆議員。阿Bill問到點樣可以提升知名度？波哥話過往反對派攻擊政府，咁咪好多人訪問，但依家千祈唔好去做「Show」，加上有傳媒鍾意報憂不報喜，同埋報花絮，唔想理實情，呢種傳媒心態好差，亦會令議員做花巧嘢。
波哥亦再憶述舊時反對派喺議會造成混亂嘅情景，佢亦曾置身係衝突場面當中。佢話以前開會好激烈，每次開會20幾個人搞你，初期有議員寫「鎮定」二字畀佢；而衝突亦令佢好易血壓高，血壓藥都換晒，因為睇到反對派倒行逆施。佢仲話反對派當年亦搞到政府唔敢提意見或者改法例，例如政府今屆提出精簡發展程序，料一般項目由「生地」變「熟地」嘅時間可縮減至4年，過往肯定做唔到喇！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
