政情：莫乃光常忘台詞 錄節目超時

莫乃光話廿幾年前，佢被安排擔任一個形式類似「每日一字」嘅節目，內容主要係介紹互聯網是甚麼。呢個節目一集雖然只得幾分鐘，但由於佢嘅記稿能力奇差，錄影一集竟用上差唔多一個鐘；加上節目係每日播放，結果總共錄咗個多星期。佢話導演耐性真係好好，但後來都不禁要同佢講，話真係創紀錄啊！然而當年並無社交媒體上載節目，更遑論分享或儲存，相關錄影或相片依家都搵唔番啦。

之不過，有一啲佢有份參與嘅時事節目，依家仍可以喺網上搜尋得到，佢話當然唔希望「熄台」後會「被下架」啦！雖然佢曾屬於資訊科技界嘅議會代表，但都試過獲邀出席娛樂台嘅怪談節目，莫乃光話可能係佢少有嘅一次「踩過界」，但都算好好玩！