昔日東方政情：復賽迎戰旅遊界 立會足球隊惜敗
立法會過往都會組成足球隊，同政府官員、公共機構或社會團體「以波會友」。隨住香港邁向疫後復常，停辦接近4年嘅足球友誼賽，尋日再度上演。重新組織嘅立法會足球隊，首仗迎戰旅遊界足球體育會，結果以1:2落敗。
今次立法會足球隊嘅陣容，議員陸頌雄、邱達根都搵埋自己嘅囝囝上陣，即係有兩隊「父子兵」；而前議員梁志祥就作為外援返嚟幫手。旅遊界前議員姚思榮雖然都有穿上紅色嘅球隊波衫，但佢就同唯一一名出席嘅女議員林琳一樣，講明唔會落場踢，只係場邊為球隊打氣，作用就好似啦啦隊咁。
球賽開始前，立法會主席梁君彥話立法會足球發燒友終於重出江湖，相信賽事精彩。佢又話，疫情打擊旅遊業，但隨住香港同內地及海外恢復通關，希望好似今日踢波咁，大腳一踢、踢走疫情、踢走陰霾。佢又揚言贏波嘅話，星期三大會會加餸咁話。但其實周三係公布財政預算案嘅日子，而唔係召開大會，咁樣又算唔算空頭支票呢？
當梁君彥同香港旅遊界足球體育會主席薩成偉一齊主持開球儀式，友誼賽正式開始。其實場波都唔少甩轆嘢，例如立法會足球隊有人將個波踢咗出界，陸頌雄隨即走埋去拎起，然後將個波掟番界內交畀自己個仔，畀人話佢「喂你公正啲呀」、「唔好淨係望住自己個仔！」
姚柏良半場換衫惹「放水」嫌疑
面對對方嘅緊密防守，立法會足球隊一直久攻不下，即使戰況激烈，上半場始終維持0:0，旅遊界議員姚柏良竟惹來「放水」嘅嫌疑，事關佢下半場就會換波衫代表旅遊界上陣。雖然最後佢都冇代表旅遊界出戰，但都繼續被議員話佢係內鬼。
下半場開波冇耐，立法會龍門就被對方攻破。何俊賢見狀即刻換上守門員衫。正當立法會足球隊士氣低落之際，約十分鐘後由外援球員建立「破蛋」奇功，一腳射入對方龍門追平比數。後來邱達根兒子起腳再射入一球，惜球證話越位在先，唔計數。
踢完上半場之後被換出嘅梁志祥，同坐喺場邊嘅姚思榮一齊作壁上觀，兩人都認為賽事將會平手告終。然而臨完場前兩分鐘，負責「守龍」嘅何俊賢失守！議員郭偉强雖趁最後幾十秒，單刀疾走帶波衝向對方龍門，但射球被對方守門員化解，未能力挽狂瀾，無法扭轉敗局。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
