政情：簡約公屋屯門選址百冇 江玉歡話好荒蕪

政府早前公布簡約公屋選址共有8個，而江玉歡前晚視察嘅地盤係屯門樂安排海水化淡廠嘅舊址，依家用作物品暫存同泊車。佢話樂安排地盤位置近海，附近有低密度洋房，可以話風涼水冷，但係咪適宜起簡約公屋實在值得商榷。

江話即使喺晚上11點由尖沙咀驅車抵達都要用上半個鐘，可見地點同市區係有相當距離，而地盤通往外界主要得一條道路，以附近洋房居民揸車出入居多，沿途簡直「乜都冇」，佢話以自己嘅裝束，相信要徒步15分鐘，先可以行到去青山公路乘搭公共交通，加上「無瓦遮頭」，日曬雨淋應該係免不了啦！

相對引起居民反彈嘅啟德世運道地盤，樂安排嘅選址似乎係「寧靜」得多，但唔代表當區居民無意見。江玉歡話近日有好多熟悉嗰區嘅人士向佢發送電郵表達憂慮，鑑於政府打算喺嗰度興建5,000個簡約公屋單位，佢話假設樓宇有19層高，每層16伙嘅話，容納5,000個家庭就需要有16幢簡約公屋。而佢經過實地視察，發現安樂排選址，冇學校、冇街市、冇商店、冇巴士，當然亦冇鐵路！究竟將來逾萬個簡約公屋居民點樣返工、返學呀？

佢又引述附近居民話買餸最就近嘅係黃金海岸商場，但一包凍肉都要收80蚊㗎，外賣平台單送餐費就要收44蚊。佢質疑位置咁偏僻，到底係咪最好嘅選址？若要增設配套先可容納幾萬居民，相關開支又要花幾多公帑呢？

講起開支，佢早前曾去信房屋局提出12項問題，當中就包括要求當局解釋興建簡約公屋成本效益方面嘅合理性。而上周三立法會工務小組開會討論簡約公屋，佢就以資料不足為由，缺席會議，但相關撥款申請最終獲通過，並提交財委會進一步審議。