昔日東方政情：中史列必修科 議員憂增學生反感
有部分教育界人士十分關注下一代對中國歷史嘅認識。本業係歷史系教授嘅議員劉智鵬，尋日喺立法會提出無立法效力嘅議員議案，建議高中選修嘅中國歷史科改名為「中國歷史地理及文化科」並列為必修，同時建議當局以「達標」或「不達標」作為該學科嘅考評機制。然而佢嘅議案就惹來其他議員提出修正；仲有人擔心中史列為高中必修嘅主張，會增加學生對中史科嘅反感程度添。
劉智鵬提出議案嘅目的，係希望中學生認識同探討中國歷史嘅演變，以及探索人文、地理、歷史之間嘅相互關係。佢認為「學而時習之，不亦說乎」，相信「高中推行持續而定時嘅中國歷史地理及文化科，必定係高中生一段愉快學習嘅經歷」，又表示佢嘅主張，唔會同公民與社會發展科課程重疊，反而係「互為表裏」。
曾經喺中學執教鞭嘅議員梁子穎指出，過往有唔少學生因擔心不能應付4個必修科，而選擇到其他地方完成中學課程，最後「兜個圈」返回香港升讀大學。因此佢憂慮，一旦將中國歷史列為高中必修科目，可能加劇學生嘅流失，甚至影響學校人手安排，或增加學生對中史科嘅反感程度。
恐課程重疊 弄巧反拙
至於提出修正案嘅議員管浩鳴，指自己雖然同意議案嘅目的，但若將科目設為必修，會衍生課程重疊、制度上須作出調整等問題，恐怕會弄巧反拙，適得其反。因此修訂將中國歷史列為中學階段嘅「必須學習經歷」。
議員鄧家彪稱「自己好鍾意歷史，初中已睇晒80冊《資治通鑑》」，但就讀大學應考相關科目只取得「B級」成績，相反「嗰啲唔鍾意中史嘅攞A」，凸顯出中史科喺考試評分方式上有扭曲。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
