政情：立會辦捐血活動 議員響應滿堂紅

一眾議員喺宴會廳影大合照，為捐血日活動揭開序幕。議員何俊賢就叫第一次捐血嘅人手持道具一齊影相，然而只有陳家珮回應佢，其他議員影完相之後大多數都話要返去開會先，陸頌雄就縮埋角落填表啦！後來陳家珮喺社交平台貼文，指定期捐血有助降血壓、平衡體內鐵質、保持心血管健康，仲可以當係身體檢查。而佢之前都有試過去捐血，可惜當日因身體抱恙而被婉拒，所以尋日係佢嘅「第一次」。至於尋日第一個捐血嘅議員就係邱達根，但佢話唔記得自己係咪第一次，或者以前讀書時都有捐過血。

講到明捐出第一滴血嘅何俊賢就似乎做足功課，一邊話「飲勝」一邊飲用電解質飲品以補充水分，佢捐血嘅時候又口噏噏話要「抬高腳」，可能議員陳振英都覺得佢好多嘢講，就話「唔使理㗎」，不過何俊賢靜咗唔夠一陣，又同陳振英傾偈，問佢「你哋嗰個年代有冇賣血？」陳振英冇佢咁好氣話「有」。喺佢哋捐血期間，議員陳勇都有走過去幫捐血嘅同事影相，之後就同議員梁熙坐咗喺角落一齊享用電解質飲品。而活動開始咗40分鐘後，僅餘最後一個「吉」嘅捐血椅就畀議員邵家輝坐咗，在場6張捐血椅終座無虛席，分別有邱達根、劉業強、邵家輝、李惟宏、何俊賢同陳振英。