昔日東方政情：政黨營運關愛隊 江玉歡反對
政府話要喺18區設立關愛隊，好多團體都呻政府資助唔夠，仲話要有籌款能力。但喺錢以外，仲有私隱嘅問題，議員江玉歡（Doreen）直情反對由政黨組織營運，以免有用公帑資助政團之嫌，用嚟做政治宣傳就更唔好。
怕成為政治宣傳工具
呢排Doreen早前喺社交平台貼文，質疑政府冇交代簡約公屋嘅細節，仲去信畀房屋局提「12問」，未見政府有乜嘢回應，佢日前嘅貼文，再以簡約公屋為例，話好似簡屋咁，地區關愛隊同樣係概念新鮮，但執行要小心嘅措施。若果團體可營運地區關愛隊，咁點樣可確保市民嘅個人資料被團體善用同保護？
Doreen又話若果有關團體只係營運一段時間，資料已外散，之後又轉到另一團體營運，咁市民嘅個人私隱就會變成「係人都知」，個人私隱形同虛設，咁樣點解決呢？點樣確保個人資料只係用喺關愛隊，而唔會被團體作其他嘅用途？
其實，過去一直有市民質疑政黨設街站收集簽名又或者係派物資等，要求市民寫低聯絡方法，亦曾被質疑係收集個人資料作其他用途。
可能前車可鑑，Doreen講明唔贊成由政團有關嘅組織營運關愛隊，佢認為應該鼓勵社會更多人參與。佢仲話亦要避免用公帑資助政團嘅嫌疑，用咗嚟做政治宣傳添！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
