政情：立會模擬新議辦亮相聆聽要求冬暖夏涼

立法會綜合大樓做緊擴建工程，喺大樓高座加建11樓至14樓嘅議員辦公室，以組裝合成法建造。主席梁君彥同行政管理委員會成員尋日組成「睇樓團」，去咗分域碼頭嘅工地上睇模擬單位。佢仲話依家喺示範單位內嘅家具電器都只係為咗營造效果，議員將來「收樓」時，單位會有基本裝修，但按行管會舊年嘅決定，唔會提供家具，議員可按自身需要購置家具。

梁君彥話從表面上睇，新辦公室同現有辦公室嘅面積、間隔同樓底高度相若，但有唔少亮點係應議員多年嚟嘅要求，例如有唔少議員曾反映，現有辦公室嘅空調系統難以調校合適溫度，「冬涼夏暖」。新辦公室改善咗空調系統，將來喺「波士房」嘅議員或喺開放式空間嘅助理，都可按自身需要獨立調節有關範圍嘅室溫。

料後年先可以進駐

對於現時議辦之間要合併共用，須拆去整幅牆身，都好麻煩，佢話將來新辦公室兩邊已預留可供拆除嘅3.6米寬牆身，可減省拆牆嘅工序同成本；鑑於每個組裝辦公室都屬於獨立單位，牆壁內藏隔音物料，隔音效果應較現時為佳，而牆身負載嘅物件重量最高可達15千克（約33磅），足以懸掛常用嘅電視機，亦可把較輕嘅物件磁貼喺牆身。

議辦由3個貨櫃組裝而成，佢話當中嘅冷氣、燈光等都係用環保同節能，趁今次機會仲將辦公室色調調淺啲「開心一啲」，讓議員同議員助理可以感覺舒適一啲，若行管會接受呢個標準，工程公司就會開始喺國內建造有關貨櫃，希望今年年底至明年初，可以將4層貨櫃安裝。工程進度理想，仲有少少超前，希望有機會超前使用，但暫時議員都要等到2025年初先可進駐。

多名議員尋日下晝都參觀咗示範單位，陳勇話新辦公室同原本立法會嘅間隔差唔多，地方四四方方，也比較實用，而且覺得用料比較好同實用，希望能夠按時完工，最好就提前完工啦，仲話千祈唔好延遲咁話。