政情：呻關愛隊資助唔多夠 梁志祥透露吼中馬會大水喉

祥哥擔任會長嘅新界社團聯會都有興趣組織關愛隊，之不過依家佢哋手頭上都有唔少社福項目喺手，好似過渡性房屋咁，若果再加埋關愛隊，會對佢哋資源分配構成壓力，所以佢就打算向馬會籌款嚟應付關愛隊嘅日常開支。佢認為馬會係社會上最有錢嘅團體之一，而且平時經常舉辦慈善活動，加上關愛隊又係政府項目，相信對方會支持喎。不過，佢都補番句話「講係咁講，唔知得唔得」，睇嚟一切都係未知之數。

新一份財政預算案喺月內公布，祥哥透露同財金官員傾過偈，希望對方可增撥資源畀關愛隊，但係對方就話經濟環境唔好，只能夠日後慢慢調節。