政情：政界落場湊熱鬧狄志遠邊吔蕉邊跑

唔少政界人士都鍾意跑步，亦有部分人尋日都有落場跑渣打馬拉松，唔單止有跑開步嘅議員鄭泳舜同着咗紅色戰衣好似「利是封」咁嘅議員陸瀚民，仲有邊跑邊吔蕉嘅社福界議員狄志遠，而官場就有「重出江湖」嘅政務司副司長卓永興，跑10公里賽事，但成績較上次慢咗廿幾分鐘。

跑半馬嘅狄志遠喺社交平台話一切如計劃進行，首先速度控制每公里喺8分鐘內，上斜用急步，落斜跑快啲，爭取番啲時間。跑咗10K就飲第一包Power Gel，15K就飲第二包。每5K水站飲兩啖水，又話知道第5K會吃力，之後就自動波，畀身體去跑，最後5K會吃力，話畀自己聽要堅持，最後喺接近大會限時3小時前完成賽事，事關佢嘅時間係2小時58分52秒，只差大約1分鐘。

陸瀚民第10年參加馬拉松

陸瀚民話今次係第10年參加馬拉松，繼續跑全馬，手錶時間全程係4小時36分19秒。佢認為香港一直以來招攬國際旅客嘅主要策略係以大型盛事帶動，要將旅客數字重新推上2018年高峰時嘅6,500萬，必定要向國際嘅民眾多宣傳本港復常情況，亦要多辦大型盛事，更要適時地解除口罩令。佢話有年輕人建議，為鼓勵全民運動，報名各個運動賽事嘅報名費係咪可以考慮加入去做免稅額呢？

至於10幾年前已經跑10公里嘅卓永興，喺社交平台話跑咗幾年馬拉松，因為玩其他運動令其小腿肌肉撕裂而停止，今次參賽可謂「重出江湖」。佢話起跑前大家玩人浪同之後混喺一大群人中跑，感覺好正同好有存在感，而跑到終點時聽到有人嗌佢個名，原來係文化體育及旅遊局局長楊潤雄等同事為佢打氣，覺得好窩心。

財經事務及庫務局副局長陳浩濂就係第18次跑半馬，仲話賽後總算成功通過「電車測試」。點解？佢話喺跑完21公里後都仲有力撐樓梯到電車上層呀！兼且10分鐘就食咗碗燒肉湯米粉，仲話尋日食嘢完全唔會有罪咎感添！