政情：葉劉倡加稅後零交流 笑言馬會發嬲

葉劉建議將「足球博彩稅」由50%上調至80%，以增加政府收入。佢透露，事前並無知會馬會，因為過去幾年，該黨都有呢個倡議，並非新事物。咁點解之前馬會似乎無咩反應，今次就有咁大反響？葉劉分析，話可能對方認為疫情期間對社會幫助唔少，例如贈送口罩等物資，但依家就掉轉槍頭針對佢哋，覺得唔可以接受，所以反應相對較大。不過，事後馬會亦無主動聯絡番佢，葉劉笑言「可能嬲咗啦」。

對於工作目標，議員李梓敬提及未來唔單止繼續經營本身KOL嘅身份之外，亦都想更貼近民生，因此嚟緊會多關注私家車、電動車、車位同港車北上等嘅議題。另外，佢亦會關注旅遊嘅議題，包括推展計劃，評核本地食肆是否對旅客友善，例如食肆有否提供簡體字餐單，有幾多員工識講普通話等。