政情：立會男團地區表演 梁熙做足台風訓練

儘管每個人都總有一、兩首「飲歌」，但梁熙強調並唔係《強》。佢話作為「飲歌」嘅條件，首先係要熟悉嘅歌曲，然而喺佢成長嘅年代，流行曲內容主要係埕埕塔塔，佢擔心同前晚音樂會嘅氣氛格格不入，於是就選擇歌詞充滿正能量嘅《強》。佢又話前晚嘅舞台因有字幕裝置，獻唱之前毋須強記歌詞；不過，周二佢要出席另一個地區音樂會，而屆時嘅場地就唔會有字幕提示，所以佢都想快啲搵番首內容積極、歌詞易記嘅「飲歌」。

至於梁熙提到向歌唱老師進行特訓，其實係事緣於早前佢落區，喺小西灣社區會堂遇到歌唱老師指導成人唱歌技巧，於是佢都趁機學埋一份。雖然學習嘅時間唔係好長，但總算可以涉獵到唱歌如何運氣、拉高聲調、掌握音準同台風嘅技巧，受用無窮咁話。

其他出席音樂會嘅男團成員，佢哋喺台上獻唱邊幾首歌呢？話說陸瀚民先唱快歌《我恨我痴心》，燃起現場嘅熾熱氣氛後，佢就同太太攜手獻唱《你最珍貴》，藉此寄語大家要珍惜眼前人；管浩鳴同李鎮強就合唱《恭喜恭喜》同《歡樂年年》兩首新年歌曲，贏得台下觀眾熱烈掌聲。