政情：李梓敬圍爐有古講話用英語還擊英方

被撤回研討會邀請兩人舉辦議會今昔座談

議員李梓敬同簡慧敏原獲安排下個月前往英國，出席由英國議會及英聯邦議會聯合會合辦嘅西敏寺研討會（Westminster Seminar），點知對方喺上個月撤回邀請。然而兩人亦並非「省油的燈」，佢哋因應赴英之行告吹，尋日邀請幾位政界人士舉辦一場「圍爐」式嘅座談會，話要用英語嚟宣揚香港議會制度嘅今昔，當然亦要就英方對香港政局嘅指控，嚴詞痛斥。

李梓敬形容英方撤回邀請嘅決定，就好似小朋友玩遊戲咁，兼且就「香港政治形勢急速惡化」嘅指控作出強烈譴責，直斥係「抹黑」同「不恰當」。佢話邀請由舊年年尾發出，直到撤邀之時香港嘅政制其實都冇咩變化。

斥英抹黑香港政治

對於前往英國出席研討會，李梓敬話佢同簡慧敏兩人根本唔在乎，反而係相當在意英方撤邀嘅理由，而佢哋就希望透過今次座談會嘅活動，解釋香港回歸前後，以及完善選舉制度後嘅分別。作為事件女主角嘅簡慧敏都批評英方嘅決定係完全不可接受，佢又話過去立法會嘅功能被忽視，依家就想「回到正軌」，認為議員需專業、愛國同高效能，仲強調現時應該冇人會覺得香港嘅立法會效率低。

由於座談會係以談論「香港議會制度嘅今昔」為旗號，喺狠批英方之外都有講其他嘢。李梓敬話回歸前嘅香港，被英國統治咁多年都冇民主，昔日立法局議員全部都係委任而非選舉，甚至立法局主席直接由港督兼任，相較於現時嘅議會制度，民主程度大大提升。

指議席票選夠民主

李又自詡其議席係透過選票而得，相信可以代表大部分人。身兼行政會議召集人嘅議員葉劉淑儀，就話議會以前有拉布、掟蕉等暴力情況出現。依家反對勢力較弱，有好多條法案得以通過，冇晒「亂象」出現，制度變得更合理同平衡。

議員周浩鼎覺得香港回歸之後變得更好，而英國政府就唔符合民眾期望，經濟又下滑，仲推出英國國民（海外）簽證供港人移居嘅計劃，目的係掠奪香港人嘅資產，指摘英國Shameful（可恥）；議員陳穎欣就話香港人同立法會議員先有資格評論香港情況。李梓敬話未來或會喺英國組織研討會，或邀英駐港領事來聽大家發言。會否成事，就要拭目以待啦。