政情：劉智鵬懶理反對 力推高中必修中史

教聯會主席黃錦良話諮詢咗會員教師意見，普遍都唔同意將中史列為高中必修科，因為高中課程剛剛先完成改革，現在需要平靜嘅環境做好公社科，宜靜不宜動。佢話理解劉智鵬身為歷史學者，對方提議將中史列為高中必修科，加強學生認識國家，絕對係應有之義。黃又話只要搞好兩地學界交流，畀本地學生能夠多元化學習，都可以學到歷史。

雖然會員對議案嘅意見唔一致，但劉智鵬唔打算收回議案，又解釋議案喺舊年10月提交，當時自己都未加入教聯會。佢又話，其實大專學界好多人都支持將中史列為高中必修科，只係大家都認為需要時間做好相關教材，可能需時幾年先搞得掂。

佢仲話內地媒體製作咗大量精彩嘅紀錄片，好適合做教材，但要解決版權問題，例如有一套講辣椒點樣喺內地傳播開來，可以從日常飲食角度出發，向學生講解中國嘅地理同歷史。唔單止教學生認識國家歷史，教聯會轄下嘅愛國教育支援中心未來會升級，同內地航天界別合作，設立高科技展室，介紹國家科技發展成果。會務亦會加強，例如提供中西醫服務畀會員教師。