政情：中立馬逢國揸旗最低工資委會減鬥氣

立法會早前討論職安健草案，勞工及商界背景議員圍繞工傷罰款金額而爭議不斷，後來更有議員不滿委員會主席、有勞工背景嘅陸頌雄「閘停」發言，憤而拉隊離席嘅場面。唔知係咪為咗避免重蹈覆轍，今日舉行嘅《2023年最低工資條例（修訂附表3）公告》及《2023年僱傭條例（修訂附表9）公告》小組委員會，即審議最低工資增至40元，就由議員馬逢國擔任主席，藉此平衡勞資雙方、減低衝突。

本委員會共11名委員，包括有勞工背景嘅郭偉强、周小松、林振昇、梁子穎、黃國；而商界背景嘅就有李鎮強，其他委員仲包括江玉歡、郭玲麗、鄧飛、顏汶羽。名單睇落就勞工界議員佔多數，似乎較具優勢。至於做主席就可以手握主導權，如控制發言時間等。

黃國促政府交制訂水平準則

對於由馬逢國擔任主席，黃國解釋話今次屬於議會默契，因為要審議嘅條例相對簡單，由立場冇咁鮮明嘅馬逢國處理會更好，亦減少「偏幫」嘅觀感。不過，黃國亦都關注最低工資嘅制訂水平，指政府要定出一個標準同客觀嘅參考準則，唔好官字兩個口，例如參考綜援水平同貧窮線等。至於林振昇亦同意搵立場較中立嘅議員做主席，應可避免兩派議員喺委員會上嘅分歧，加上馬逢國經驗相對資深，相信可以勝任有關職位。

過往商界同勞工背景嘅議員，一直喺多個議題上都針鋒相對，包括去年通過嘅強積金對沖，當時勞工界議員擔心條例「一拖再拖」，商界則擔心社會面臨經濟困局，取消強積金對沖會令企業百上加斤。

另外，去年4月嘅立法會大會視像會議，議員鄧家彪提出改革香港扶貧政策和策略議案，其中梁子穎提出，最低工資由兩年一檢改為一年一檢等。但大部分商界背景議員都反對呢項修正案，只有林健鋒投贊成，而修正案喺分組投票下，得唔到過半數議員贊成而被否決。

去年7月，立法會審議完善法定最低工資制度議員議案，喺多名商界議員反對下，議案遭否決。

議員張宇人指好多國家，最低工資只係政客為選票而提出嘅主張，實質係糖衣陷阱。唔知今次委員會商界僅得李鎮強代表，可唔可以表述其論點呢？

政府早前表示，條例如獲立法會通過，經修訂嘅法定最低工資水平將於今年5月1日，即勞動節當日實施，係2019年5月以來再一次調升，升幅為6.7%；僱主豁免紀錄僱員工時嘅月薪水平亦由15,300元增至16,300元。