昔日東方政情：樹立民族自信 郭偉强倡着華服開立會
常見喺舞台或電視嘅古裝衣着，若改由代議士穿上會係乜嘢效果呢？勞工界議員郭偉强日前就示範畀大家睇嘞！但見一頭現代髮型嘅佢穿上一襲紅色嘅明朝官服，雖然睇落唔太脗合，不過佢都唔介意，仲話要爭取今年11月22日立法會大會，鼓勵更多議員穿「華服」參與會議喎。
着明朝官服作示範
點解要揀11月22日呢？話說有組織倡議政府將當日定為「全港華服日」，以鼓勵全體華人日常穿華服工作生活、樹立民族自信咁話。而佢就應呢個組織嘅邀請出席日前嘅「華服倡議日」，至於佢身上嘅「華服」胸前有仙鶴圖案，照睇就係明朝嘅一品文官服裝，不過佢頭上無烏紗，臉又冇留鬚，難免會有啲違和感囉。
講番着「華服」開會，郭偉强話議員同事劉智鵬都支持呢個主張。但睇番立法會《議事規則》，議員出席會議必須穿着商務衣飾。到底議事堂會否出現，身穿明朝官服嘅議員質詢高級公僕嘅場面呢？咁就要視乎立法會主席會否行使酌情權啦！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
