昔日東方政情：小豆丁爭舉手 向劉業強表訴求
疫情緩和，立法會早前恢復實體嘅教育導賞團。呢排都有唔少幼稚園學生參觀立法會大樓，尋日就輪到身兼新界鄉議局主席嘅劉業強帶團，正如佢所講呢班「小豆丁」精靈活潑，仲即時向佢表達「訴求」。大家估吓佢哋爭取啲乜嘢呢？
要求屋企附近開雪糕店
劉業強接待嘅係基督堂幼稚園嘅小朋友，佢話呢班幼稚園小豆丁對議會運作同議員嘅工作點滴感到好奇，沿途亦非常踴躍咁向佢發問，包括議員嘅職責、上下班時間同工作日程等，仲有小朋友話長大後要做議員，佢就鼓勵小朋友努力讀書，多關心社會，向夢想出發。
去到討論議會工作嘅時候，佢話畀班小豆丁知議員係民意代表，其中一個職責係反映市民訴求，有小朋友即時活學活用，立即舉手向佢表達「訴求」。係乜嘢？原來係希望爭取喺屋企附近興建「雪糕店、公園同籃球場」。
佢話呢班小豆丁年紀小小已經識得關注「自身權益」，兼勇於表達，令佢刮目相看。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
