政情：推動經濟轉型提升科技水平港急需升呢Web3.0

為推動經濟轉型，達到「國際創新科技中心」嘅長遠目標，香港本身嘅科技水平需有所提升。政府將於兩星期後發表《財政預算案》，3位議員尋日中午會晤財金官員並提交建議書，要求政府喺思維上更具跨越性、優化同增加數碼基建、以及盡快制訂Web3.0戰略發展藍圖，將香港嘅創科行業生產提高至本地生產總值2%。到底Web3.0係乜嘢概念呢？話說政府推出嘅一站式個人化數碼服務平台「智方便」，都只不過係Web1.0嘅層面咋！

所謂Web3.0，其實係第3代互聯網嘅簡稱。議員葛珮帆話，創科對香港整體提升競爭力、經濟發展、民生同政府施政都係非常重要，所以財政預算案亦應大力支持香港創科發展。鑑於互聯網同創科世界發展迅速，依家已去到Web3.0嘅時代，佢認為唔可以單喺金融方面考慮Web3.0嘅發展，會要求財政司司長增撥資源，以帶領同制訂香港Web3.0嘅戰略發展藍圖，增撥資源培訓人才，為初創企業制訂法規，同發展穩定幣等。

葛珮帆倡設大數據局

葛珮帆又提到數據嘅應用，然而政府裏面嘅數據都係零散分布喺唔同嘅部門，不能互聯互通，統計處仍沿用最古老嘅方法處理數據。因此佢建議政府設立「大數據局」，或將政府統計處改組為「大數據局」以統合數據，冀有專家團隊，去收集、分析、整理以及開放有用嘅數據，至可以具備條件去發展智慧政府或智慧城市。

議員邱達根就話，發展國際創科中心，完善嘅數碼基建必不可少，故建議政府加快優化「智方便」嘅身份認證功能，並將其發展成連結政府所有電子化服務嘅核心應用程式，同埋要加強應用區塊鏈技術，將「智方便」由Web1.0提升至Web3.0層面，進一步做好政務管理工作。

另外，政府應在北部都會區設立數據產業園區，以及興建超級計算中心。為招攬人才，邱達根又建議政府重新推出「投資移民計劃」，並參考英國做法，重點引進具實際經營或研發經驗嘅海內外人士。但對於政府有意規管眾籌活動，佢就話多個業界都表示憂慮，擔心會對企業融資造成打擊，呼籲政府要再三考慮。

對於加強「智方便」嘅應用，議員黃錦輝都同意呢個主張，同時又建議當局透過資助，鼓勵加強研究更具創新嘅三維晶片設計，仲可藉此吸引相關專才來港添！

第一手消息請下載on.cc東網 iPhone/ iPad/ Android/

本文連結 : https://orientaldaily.on.cc/content/要聞港聞/odn-20230209-0209_00176_401/政情：推動經濟轉型--提升科技水平--港急需升呢Web3-0

爆料熱線：

(852) 3600 3600

傳真：

(852) 3600 8800

SMS：