政情：科研搶人在在需財 學者倡遠眺將來

眾所周知，發展科研嘅其中一個條件，係人才。香港青年科學院院長岑浩璋就認為，無論係頂尖學者還是研究生，香港都好缺。雖則政府揚言「搶人才」，但岑指出科研人才會到處流動，點樣先可以令人才願意留港，政府真係要好好思考。佢話若擁有其他地方所不具嘅頂尖設備、高端實驗室，令人才能夠有一展所長嘅硬件設施，往往係佢哋決定嚟唔嚟嘅考慮因素。但可惜嘅係，政府呢方面做得唔足，其實呢啲設備由購入、興建到落成之後嘅運作都要好多資金，甚至短期內唔會有實際成果，咁睇落私人機構都好難主動做，所以佢話政府要承擔起呢一個責任，而且唔可以咁短視去睇成效，而係要睇長遠目標。

講起科研人才，香港科學院院長盧煜明認為香港為要達到藍圖目標，人才就一定要搶番嚟，而且最缺乏既識做生意、又識做科研嘅人才，畢竟生意同科研都好重要。至於香港喺產、學、研轉化方面，盧覺得香港嘅優勢同劣勢並列。佢以自己從事嘅醫護行業為例，香港大部分市民睇醫生都係搵公立醫院，所以公立醫院方面就容易攞數據做研究；但同時礙於香港人口基數較少，因此缺乏樣本更多嘅數據，加上內地嘅科研有「負面清單」，入面嘅技術連港人都唔可以學，就好似基因測試咁，導致發展時會有阻滯。佢表示本港正積極同內地商討數據聯通，又透露創科局局長孫東話內地依家對聯通嘅態度有所「鬆動」，甚至有部分計劃可望快將放寬限制添！

香港科學院目前會向創新科技署嘅創新科技基金申請資助，金額每次不同，要視乎該年度所舉辦嘅活動，不過盧煜明話會同前任院長徐立之一樣，朝住成為法定機構嘅目標出發，咁以後資助都會更加穩定，可以舉辦更多活動。