要聞港聞

笑看天下:龜速拓地 空談發展

上屆政府做事,最愛吹水,政策多多卻總是拖拖拉拉,沒有坐言起行做實事。所謂「長遠房屋政策」,又係得個「噏」字,到頭來臨落雨收柴,先嚟廢噏甚麼「前人種樹,後人乘涼」!實情係公屋輪候冊愈積愈厚,市民上樓等到頸長眼出血。
本屆政府主張「以結果為目標」,喺房策上要提量、提速及提效,又提出「公屋提前上樓」計劃,用心良苦,可惜因配套設施未能配合,居民上班上學十分不便,叫苦連天!《施政報告》為了要助市民「告別劏房」,政府推出「簡約公屋」,之不過由於造價高、選址偏,一直引來爭議,其中一幅位於啟德嘅選址因屬商業核心區,地王值萬金,用嚟起簡約公屋,究竟是否「嘥料」,更惹來紛爭。
嗱!本報民調顯示,大部分受訪者批評政府嘅簡約公屋計劃浪費時間及金錢,倒不如加快興建永久性嘅傳統公屋更實際,批評當局處理房屋問題藥石亂投,更質疑簡約公屋成效。受訪者歸咎政府一直冇善用土地資源,又認為房屋政策「走捷徑」無助解決問題,房屋發展最終恐原地踏步。
事實上,從本報民調,反映市民嘅識見比之政府更深明「欲速則不達」,而管理者最重要係「必須成事」而非製造紛擾!應該實事求是嘅政府卻永遠冇積極去跟進,捨正途而弗由,梗係唔掂啦!呢,本報尋日踢爆港府自公布發展北部都會區以來,只收約30公頃棕地,僅佔整個發展區嘅3%面積,並預料多花4年時間才收回約200公頃棕地,累計回收嘅棕地面積亦僅佔24%。有環團直言港府以龜速收棕地,進度及不上非法開墾嘅速度,完全空談發展。生命有限而流年易逝,政府一味講多過做,「房事」求「簡約」,你估坐禪默想就可得道成仙咩!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500