政情：自駕過關20分鐘入境 江玉歡 吳傑莊 深圳歎消夜

江玉歡話前晚約11時，喺香港關口見到大概10多架車正等候過關，大家為見證重要嘅全面通關特意深夜到來。而佢同吳傑莊之後到水圍消夜，食過美食後乘車回港。江指整個過程順利，完全感受到內地同胞嘅熱情和期待！佢又形容疫情3年，終究「守得雲開見月明」，相信全面通關能為本港經濟注入更多活水，帶來正面刺激作用，本地旅遊、零售、酒店、交通等各領域將迎來快速復甦嘅曙光，令香港經濟滿血復活！吳傑莊就話整個通關流程非常有序同流暢，絕對有利於兩地人員嘅緊密往來，相信對經濟有非常積極嘅作用。

其實，多名議員都去咗唔同口岸，睇吓過關嘅情況。議員李鎮強就特意由珠海經港珠澳大橋回港，話唔再需要檢查核酸報告，感覺超爽，期盼開始會有更多旅客經海、陸、空唔同口岸嚟到香港，感受香港多姿多采嘅生活、享受香港大江南北嘅美食，觀賞香港東方之珠嘅景色咁話。

至於高鐵方面，咁啱議員楊永杰要去內地開會，佢話尋日高鐵人流較多，但過關好暢順，唔使點樣排隊，而佢坐嗰班列車座位約九成滿，較首個復運日嘅兩至三成滿嘅情況嚟睇，相信同免核酸及撤銷車票發售上限有莫大關係。

另一議員劉國勳尋日亦去到羅湖站視察體驗，話整個過程非常順暢，同疫情前無太大分別，只係需要填寫健康申報碼，由上水上車到羅湖過關，10分鐘內已經過關嘞！佢亦都留意到過關回程時，見到唔少跨境學童排隊，羅湖口岸亦做咗人流管制，雖然有一陣輪候時間，但過程亦算暢順，建議留意人流情況，有需要可重新安排跨境學童專道。